द्वितीयः
साधनपादः।
अव०- उद्दिष्टः
समाहितचित्तस्य
योगः। कथं
व्युत्थितचित्तोऽपि
योगयुक्तः
स्यादित्येतदारभ्यते
तपःस्वाध्यायेश्वरप्रणिधानानि
क्रियायोगः॥१॥
व्या०
भा० नातपस्विनो
योगः
सिद्ध्यति।
अनादिकर्मक्लेशवासनाचित्रा
प्रत्युपस्थितविषयजाला
चाशुद्धिर्नान्तरेण
तपः सम्भेदमापद्यत
इति तपस
उपादानम्।
तच्च
चित्तप्रसादनमबाधमानमनेनासेव्यमिति
मन्यते।
स्वाध्यायः
प्रणवादिपवित्राणां
जपो मोक्षशास्त्राध्ययनं
वा।
ईश्वरप्रणिधानं
सर्वक्रियाणां
परमगुरावर्पणं
तत्फलसंन्यासो
वा॥१॥
अव०- स हि
क्रियायोगः
समाधिभावनार्थः
क्लेशतनूकरणार्थश्च॥२॥
व्या०
भा० स
ह्यासेव्यमानः
समाधिं
भावयति
क्लेशांश्च
प्रतनूकरोति।
प्रतनूकृतान्क्लेशान्प्रसङ्ख्यानाग्निना
दग्धबीजकल्पानप्रसवधर्मिणः
करिष्यतीति
तेषां
तनूकरणात्पुनः
क्लेशैरपरामृष्टा
सत्त्वपुरुषान्यताख्यातिः
सूक्ष्मा
प्रज्ञा
समाप्ताधिकारा
प्रतिप्रसवाय
कल्पिष्यत
इति॥२॥
अव०- अथ के
ते क्लेशाः?
कियन्तो वेति?
अविद्याऽस्मितारागद्वेषाऽभिनिवेशाः
क्लेशाः॥३॥
व्या०
भा० क्लेशा
इति पञ्च
विपर्यया
इत्यर्थः। ते
स्यन्दमाना
गुणाधिकारं
द्रढयन्ति, परिणाममवस्थापयन्ति, कार्यकारणस्रोत
उन्नमयन्ति, परस्परानुग्रहतन्त्रीभूय
कर्मविपाकं
चाभिनिर्हरन्तीति॥३॥
अविद्या
क्षेत्रमुत्तरेषां
प्रसुप्ततनुविच्छिन्नोदाराणाम्॥४॥
व्या०
भा० अत्राविद्या
क्षेत्रं
प्रसवभूमिरुत्तरेषामस्मितादीनां
चतुर्विधकल्पानां
प्रसुप्ततनुविच्छिन्नोदाराणाम्।
तत्र का
प्रसुप्तिः? चेतसि
शक्तिमात्रप्रतिष्ठानां
बीजभावोपगमः, तस्य
प्रबोध
आलम्बने
सम्मुखीभावः।
प्रसङ्ख्यानवतो
दग्धक्लेशबीजस्य
सम्मुखीभूतेऽप्यालम्बने
नासौ
पुनरस्ति।
दग्धबीजस्य
कुतः प्ररोह
इति। अतः
क्षीणक्लेशः
कुशलश्चरमदेह
इत्युच्यते। तत्रैव
सा गधबीजभावा
पञ्चमी
क्लेशावस्था
नान्यत्रेति।
सतां
क्लेशानां
तदा
बीजसामर्थ्यं
दग्धमिति
विषयस्य
सम्मुखीभावेऽपि
सति न
भवत्येषां प्रबोध
इति उक्ता
प्रसुप्तिर्दग्धबीजानामप्ररोहश्च।
तनुत्वमुच्यते
प्रतिपक्षभावनोपहताः
क्लेशास्तनवो
भवन्ति। तथा
विच्छिद्य
विच्छिद्य
तेन
तेनात्मना पुनः
पुनः
समुदाचरन्तीति
विच्छिन्नाः।
कथं? रागकाले
क्रोधस्यादर्शनात्। न हि
रागकाले
क्रोधः
समुदाचरति।
रागश्च
क्वचिद्दृश्यमानो
न विषयान्तरे
नास्ति।
नैकस्यां
स्त्रियां
चैत्रो रक्त
इत्यन्यासु
स्त्रीषु
विरक्त इति।
किन्तु तत्र
रागो
लब्धवृत्तिरन्यत्र
तु भविष्यद्वृत्तिरिति।
स हि तदा
प्रसुप्ततनुविच्छिन्नो
भवति। विषये
यो
लब्धवृत्तिः
स उदारः।
सर्व
एवैते
क्लेशविषयत्वं
नातिक्रामन्ति।
कस्तर्हि
विच्छिन्नः
प्रसुप्ततनुरुदारो
वा क्लेश इति।
उच्यते सत्यमेवैतत्।
किन्तु
विशिष्टानामेवैतेषां
विच्छिन्नादित्वम्।
यथैव
प्रतिपक्षभावनातो
निवृत्तस्तथैव
स्वव्यञ्जकाञ्जनेनाभिव्यक्त
इति। सर्व
एवामी क्लेशा
अविद्याभेदाः।
कस्मात्? सर्वेष्वविद्यैवाभिप्लवते।
यदविद्यया
वस्त्वाकार्यते तदेवानुशेरते
क्लेशा
विपर्यासप्रत्ययकाल
उपलभ्यन्ते,
क्षीयमाणां
चाविद्यामनु
क्षीयन्त इति॥४॥
अव०- तत्राविद्यास्वरूपमुच्यते
अनित्याऽशुचिदुःखाऽनात्मसु
नित्यशुचिसुखाऽत्मख्यातिरविद्या॥५॥
व्या०
भा० अनित्ये
कार्ये
नित्यख्यातिः।
तद्यथा, ध्रुवा
पृथिवी, ध्रुवा
सचन्द्रतारका
द्यौः, अमृता
दिवौकस इति।
तथाशुचौ
परमबीभत्से
काये
शुचिख्यातिः।
उक्तं च
स्थानाद्बीजादुपष्ठम्बान्निःस्यन्दान्निधनादपि।
कायमाधेयशौचत्वात्पण्डिता
ह्यशुचिं
विदुः॥
इत्यशुचौ
शरीरे
शुचिख्यातिर्दृश्यते।
नवेव
शशाङ्कलेखाकमनीयेयं
कन्या
मध्वमृतावयवनिर्मितेव
चन्द्रं
भित्त्वा
निःसृतेव ज्ञायते, नीलोत्पलपत्रायताक्षी
हावगर्भाभ्यां
लोचनाभ्यां
जीवलोकमाश्वासयन्तीवेति
कस्य केनाभिसम्बन्धः? भवति
चैवमशुचौ
शुचिविपर्यासप्रत्यय
इति।
एतेनापुण्ये
पुण्यप्रत्ययस्तथैवानर्थे
चार्थप्रत्ययो
व्याख्यातः।
तथा
दुःखे
सुखख्यातिं
वक्ष्यति परिणामतापसंस्कारदुःखैर्गुणवृत्तिविरोधाच्च
दुःखमेव
सर्वं
विवेकिनः
[यो.सू. २.१५] इति।
तत्र
सुखख्यातिरविद्या।
तथाऽनात्मन्यात्मख्यातिर्बाह्योपकरणेषु
चेतनाचेतनेषु
भोगाधिष्ठाने
वा शरीरे, पुरुषोपकरणे
वा
मनस्यनात्मन्यात्मख्यातिरिति।
तथैतदत्रोक्तम्
व्यक्तमव्यक्तं
वा
सत्त्वमात्मत्वेनाभिप्रतीत्य
तस्य
सम्पदमनुनन्दत्यात्मसम्पदं
मन्वानस्तस्य
व्यापदमनुशोचत्यात्मव्यापदं
मन्वानः स
सर्वोऽतिबुद्ध
इति।
एषा
चतुष्पदा
भवत्यविद्या
मूलमस्य
क्लेशसन्तानस्य
कर्माशयस्य च
सविपाकस्येति।
तस्याश्चामित्रागोष्पदवद्वस्तुसतत्त्वं
विज्ञेयम्।
यथा नामित्रो
मित्राभावो न
मित्रमात्रं
किन्तु
तद्विरुद्धः
सपत्नः। तथा
चागोष्पदं न
गोष्पदाभावो
न गोष्पदमात्रं
किन्तु देश एव
ताभ्यामन्यद्वस्त्वन्तरम्।
एवमविद्या न
प्रमाणं न
प्रमाणाभावः, किन्तु
विद्याविपरीतं
ज्ञानान्तरमविद्येति॥५॥
दृग्दर्शनशक्त्योरेकात्मतेवाऽस्मिता॥६॥
व्या०
भा० पुरुषो
दृक्शक्तिर्बुद्धिर्दर्शनशक्तिरित्येतयोरेकस्वरूपापत्तिरिवास्मिता
क्लेश उच्यते।
भोक्तृभोग्यशक्त्योरत्यन्तविभक्तयोरत्यन्तासङ्कीर्णयोरविभागप्राप्ताविव
सत्यां भोगः
कल्पते।
स्वरूपप्रतिलम्भे
तु तयोः
कैवल्यमेव
भवति कुतो भोग
इति। तथा
चोक्तं बुद्धितः
परं
पुरुषमाकारशीलविद्यादिभिर्विभक्तमपश्यन्कुर्यात्तत्राऽऽत्मबुद्धिं
मोहेनेति॥६॥
सुखानुशयी
रागः॥७॥
व्या०
भा० सुखाभिज्ञस्य
सुखानुस्मृतिपूर्वः
सुखे
तत्साधने वा यो
गर्धस्तृष्णा
लोभः स राग
इति॥७॥
दुःखानुशयी
द्वेषः॥८॥
व्या०
भा० दुःखाभिज्ञस्य
दुःखानुस्मृतिपूर्वो
दुःखे
तत्साधने
वा यः प्रतिघो
मन्युर्जिघांसा
क्रोधः स
द्वेष इति॥८॥
स्वरसवाही
विदुषोऽपि
तथाऽऽरूढोऽभिनिवेशः॥९॥
व्या०
भा० सर्वस्य
प्राणिन
इयमात्माशीर्नित्या
भवति, मा न
भूवं
भूयासमिति। न
चाननुभूतमरणधर्मकस्यैषा
भवत्यात्माशीः।
एतया च
पूर्वजन्मानुभवः
प्रतीयते, स
चायमभिनिवेशः
क्लेशः
स्वरसवाही
कृमेरपि जातमात्रस्य
प्रत्यक्षानुमानागमैरसम्भावितौ
मरणत्रास
उच्छेददृष्ट्यात्मकः
पूर्वजन्मानुभूतं
मरणदुःखमनुमापयति।
यथा
चायमत्यन्तमूढेषु
दृश्यते
क्लेशस्तथा
विदुषोऽपि
विज्ञातपूर्वापरान्तस्य
रूढः। कस्मात्? समाना हि
तयोः
कुशलाकुशलयोर्मरणदुःखानुभवादियं
वासनेति॥९॥
ते
प्रतिप्रसवहेयाः
सूक्ष्माः॥१०॥
व्या०
भा० ते
पञ्चक्लेशा
दग्धबीजकल्पा
योगिनश्चरिताधिकारे
चेतसि
प्रलीने सह
तेनैवास्तं
गच्छन्ति॥१०॥
अव०- स्थितानां
तु
बीजभावोपगतानां
ध्यानहेयास्तद्वृत्तयः॥११॥
व्या०
भा० क्लेशानां
या वृत्तयः
स्थूलास्ताः
क्रियायोगेन तनूकृताः
सत्यः
प्रसङ्ख्यानेन
ध्यानेन हातव्या
यावत्सूक्ष्मीकृता
यावद्दग्धबीजकल्पा
इति। यथा च
वस्त्राणां
स्थूलो मलः
पूर्वं
निर्धूयते
पश्चात्सूक्ष्मो
यत्नेनोपायेन
चापनीयते, तथा
स्वल्पप्रतिपक्षाः
स्थूला
वृत्तयः क्लेशानां, सूक्ष्मास्तु
महाप्रतिपक्षा
इति॥११॥
क्लेशमूलः
कर्माशयो
दृष्टाऽदृष्टजन्मवेदनीयः॥१२॥
व्या०
भा० तत्र
पुण्यापुण्यकर्माशयः
कामलोभमोहक्रोधप्रसवः।
स
दृष्टजन्मवेदनीयश्चाऽदृष्टजन्मवेदनीयश्च।
तत्र
तीव्रसंवेगेन
मन्त्रतपःसमाधिभिर्निर्वर्तित
ईश्वरदेवतामहर्षिमहानुभावानामाराधनाद्वा
यः
परिनिष्पन्नः
स सद्यः परिपच्यते
पुण्यकर्माशय
इति। तथा
तीव्रक्लेशेन
भीतव्याधितकृपणेषु
विश्वासोपगतेषु
वा
महानुभावेषु
वा तपस्विषु कृतः
पुनः
पुनरुपकारः स
चापि
पापकर्माशयः
सद्य एव
परिपच्यते।
यथा
नन्दीश्वरः
कुमारो
मनुष्यपरिणामं
हित्वा
देवत्वेन
परिणतः, तथा
नहुषोऽपि
देवानामिन्द्रः
स्वकं परिणामं
हित्वा
तिर्यक्त्वेन
परिणत इति।
तत्र
नारकाणां
नास्ति
दृष्टजन्मवेदनीयः
कर्माशयः।
क्षीणक्लेशानामपि
नास्त्यदृष्टजन्मवेदनीयः
कर्माशय इति॥१२॥
सति
मूले
तद्विपाको
जात्यायुर्भोगाः॥१३॥
व्या०
भा० सत्सु
क्लेशेषु
कर्माशयो
विपाकारम्भी भवति
नोच्छिन्नक्लेशमूलः।
यथा
तुषावनद्धाः
शालितण्डुला
अदग्धबीजभावाः
प्ररोहसमर्था
भवन्ति, नापनीततुषा
दग्धबीजभावा
वा, तथा
क्लेशावनद्धः
कर्माशयो
विपाकप्ररोही
भवति, नापनीतक्लेशो
न
प्रसङ्ख्यानदग्धक्लेशबीजभावो
वेति। स च
विपाकस्त्रिविधो
जातिरायुर्भोग
इति।
तत्रेदं
विचार्यते किमेकं
कर्मैकस्य
जन्मनः
कारणमथैकं
कर्मानेकं
जन्माक्षिपतीति? द्वितीया
विचारणा किमनेकं
कर्मानेकं
जन्म
निर्वर्तयत्यथाऽनेकं
कर्मैकं जन्म
निर्वर्तयतीति?
न
तावदेकं
कर्मैकस्य
जन्मनः
कारणम्।
कस्मात्? अनादिकालप्रचितस्यासङ्ख्येयस्यावशिष्टकर्मणः
साम्प्रतिकस्य
च
फलक्रमानियमादनाश्वासो
लोकस्य
प्रसक्तः, स
चानिष्ट इति।
न चैकं
कर्मानेकस्य
जन्मनः
कारणम्।
कस्मात्? अनेकेषु
कर्मस्वेकैकमेव
कर्मानेकस्य
जन्मनः
कारणमित्यवशिष्टस्य
विपाककालाभावः
प्रसक्तः स
चाप्यनिष्ट
इति। न चानेकं
कर्मानेकस्य
जन्मनःकारणम्।
कस्मात्? तदनेकं
जन्म युगपन्न
सम्भवतीति
क्रमेणैव वाच्यम्।
तथा च
पूर्वदोषानुषङ्गः।
तस्माज्जन्मप्रायणान्तरे
कृतः
पुण्यापुण्यकर्माशयप्रचयो
विचित्रः
प्रधानोपसर्जनभावेनावस्थितः
प्रायणाभिव्यक्त
एकप्रघट्टकेन
मिलित्वा
मरणं
प्रसाध्य
सम्मूर्च्छित
एकमेव जन्म
करोति। तच्च
जन्म तेनैव
कर्मणा
लब्धायुष्कं
भवति।
तस्मिन्नायुषि
तेनैव कर्मणा
भोगः सम्पद्यत
इति। असौ
कर्माशयो
जन्मायुर्भोगहेतुत्वात्त्रिविधपाकोऽभिधीयत
इति। अत
एकभविक
कर्माशय उक्त
इति।
दृष्टजन्मवेदनीयस्त्वेकविपाकारम्भी
भोगहेतुत्वात्, द्विपाकारम्भी
वा
भोगायुर्हेतुत्वान्नन्दीश्वरवन्नहुषवद्वेति।
क्लेशकर्मविपाकानुभवनिर्वर्तिताभिस्तु
वासनाभिरनादिकालसम्मूर्च्छितमिदं
चित्तं
चित्रीकृतमिव
सर्वतो
मत्स्यजालं
ग्रन्थिभिरिवाततमित्येता
अनेकभवपूर्विका
वासनाः।
यस्त्वयं
कर्माशय एष
एवैकभविक
उक्त इति। ये
संस्काराः
स्मृतिहेतवस्ता
वासनास्ताश्चाऽनादिकालीना
इति।
यस्त्वसावेकभविकः
कर्माशय स
नियतविपाकश्चानियतविपाकश्च।
तत्रादृष्टजन्मवेदनीयस्य
नियतविपाकस्यैवायं
नियमो न
त्वदृष्टजन्मवेदनीयस्यानियतविपाकस्य।
कस्मात्? यो
ह्यदृष्टजन्मवेदनीयोऽनियतविपाकस्तस्य
त्रयी गतिः कृतस्याविपक्वस्य
विनाशः
प्रधानकर्मण्यावापगमनं
वा, नियतविपाकप्रधानकर्मणाभिभूतस्य
वा चिरमवस्थानमिति।
तत्र
कृतस्याविपक्वस्य
नाशो यथा
शुक्लकर्मोदयादिहैव
नाशः
कृष्णस्य।
यत्रेदमुक्तम्
द्वे
द्वे ह वै
कर्मणी
वेदितव्ये पापकस्यैको
राशिः
पुण्यकृतोऽपहन्ति।
तदिच्छस्व
कर्माणि
सुकृतानि
कर्तुम् इहैव
ते कर्म कवयो वेदयन्ते॥
प्रधानकर्मण्यावापगमनम्।
यत्रेदमुक्तम्
स्यात्स्वल्पः
सङ्करः
सपरिहारः
सप्रत्यवमर्षः,
कुशलस्य
नापकर्षायालम्।
कस्मात्? कुशलं
हि मे
बह्वन्यदस्ति
यत्रायमावापं
गतः
स्वर्गेऽप्यपकर्षमल्पं
करिष्यति इति।
नियतविपाकप्रधानकर्मणाभिभूतस्य
वा चिरमवस्थानम्।
कथमिति? अदृष्टजन्मवेदनीयस्यैव
नियतविपाकस्य
कर्मणः समानं
मरणमभिव्यक्तिकारणमुक्तम्, न
त्वदृष्टजन्मवेदनीयाऽनियतविपाकस्य।
यत्त्वदृष्टजन्मवेदनीयं
कर्माऽनियतविपाकं
तन्नश्येदावापं
वा गच्छेदभिभूतं
वा चिरमप्युपासीत, यावत्समानं
कर्माभिव्यञ्जकं
निमित्तमस्य
न विपाकाभिमुखं
करोतीति।
तद्विपाकस्यैव
देशकालनिमित्तानवधारणादियं
कर्मगतिश्चित्रा
दुर्विज्ञाना चेति।
न
चोत्सर्गस्यापवादान्निवृत्तिरित्येकभविकः
कर्माशयोऽनुज्ञायत
इति॥१३॥
ते
ह्लादपरितापफलाः
पुण्याऽपुण्यहेतुत्वात्॥१४॥
व्या०
भा० ते
जन्मायुर्भागाः
पुण्यहेतुकाः
सुखफला, अपुण्यहेतुकाः
दुःखफला इति।
यथा चेदं
दुःखं
प्रतिकूलात्मकमेवं
विशेषसुखकालेऽपि
दुःखमस्त्येव
प्रतिकूलात्मकं
योगिनः॥१४॥
अव०- कथं
तदुपपद्यते?
परिणामतापसंस्कारदुःखैर्गुणवृत्तिविरोधाच्च दुःखमेव
सर्वं
विवेकिनः॥१५॥
व्या०
भा० सर्वस्यायं
रागानुविद्धश्चेतनाचेतनसाधनाधीनः
सुखानुभव इति
तत्रास्ति
रागजः
कर्माशयः।
तथा च
द्वेष्टि
दुःखसाधनानि
मुह्यति चेति
द्वेषमोहकृतोऽप्यस्ति
कर्माशयः।
तथा चोक्तम्
नानुपहत्य
भूतान्युपभोगः
सम्भवतीति
हिंसाकृतोऽप्यस्ति
शारीरः
कर्माशय इति।
विषयसुखं
चाविद्येत्युक्तम्।
या
भोगेष्विन्द्रियाणां
तृप्तेरुपशान्तिस्तत्सुखम्।
या
लौल्यादनुपशान्तिस्तद्दुःखम्।
न
चेन्द्रियाणां
भोगाभ्यासेन
वैतृष्ण्यं कर्तुं
शक्यम्।
कस्मात्? यतो
भोगाभ्यासमनुविवर्धन्ते
रागाः कौशलानि
चेन्द्रियाणामिति।
तस्मादनुपायः
सुखस्य
भोगाभ्यास
इति। स खल्वयं
वृश्चिकविषभीत
इवाशीविशेण
दष्टो यः
सुखार्थी
विषयानुवासितो
महति
दुःखपङ्के
निमग्न इति।
एषा
परिणामदुःखता
नाम
प्रतिकूला
सुखान्वस्थायामपि
योगिनमेव
क्लिश्नाति।
अथ का
तापदुःखता? सर्वस्य
द्वेषानुविद्धश्चेतनाचेतनसाधनाधीनस्तापानुभव
इति।
तत्रास्ति
द्वेषजः
कर्माशयः।
सुखसाधनानि च
प्रार्थयमानः
कायेन वाचा
मनसा च
परिस्पन्दते।
ततः
परमनुगृह्णात्युपहन्ति
चेति परानुग्रहपीडाभ्यां
धर्माऽधर्मावुपचिनोति।
स कर्माशयो
लोभान्मोहाच्च
भवतीत्येषा
तापदुःखतोच्यते।
का
पुनः
संस्कारदुःखता? सुखानुभवात्सुखसंस्काराशयो
दुःखानुभवादपि
दुःखसंस्काराशय
इति? एवं
कर्मभ्यो
विपाकेऽनुभूयमाने
सुखे दुःखे वा
पुनः
कर्माशयप्रचय
इति।
एवमिदमनादिदुःखस्रोतो
विप्रसृतं
योगिनमेव
प्रतिकूलात्मकत्वादुद्वेजयति।
कस्मात्? अक्षिपात्रकल्पो
हि
विद्वानिति।
यथोर्णातन्तुरक्षिपात्रे
न्यस्तः
स्पर्शेन
दुःखयति न
चान्येषु
गात्रावयवेषु।
एवमेतानि
दुःखान्यक्षिपात्रकल्पं
योगिनमेव
क्लिश्नन्ति
नेतरं
प्रतिपत्तारम्।
इतरं
तु
स्वकर्मोपहृतं
दुःखमुपात्तमुपात्तं
त्यजन्तं,
त्यक्तं
त्यक्तमुपाददानमनादिवासनाविचित्रया
चित्तवृत्त्या
समन्ततोऽनुविद्धमिवाविद्यया
हातव्य
एवाहङ्कारममकारानुपातिनं
जातं जातं
बाह्याध्यात्मिकोभयनिमित्तास्त्रिपर्वाणस्तापा
अनुप्लवन्ते।
तदेवमनादिदुःखस्रोतसा
व्युह्यमानमात्मानं
भूतग्रामं च
दृष्ट्वा
योगी
सर्वदुःखक्षयकारणं
सम्यग्दर्शनं
शरणं
प्रपद्यत इति।
गुणवृत्त्यविरोधाच्च
दुःखमेव
सर्वं विवेकिनः।
प्रख्याप्रवृत्तिस्थितिरूपा
बुद्धिगुणाः
परस्पराऽनुग्रहतन्त्रीभूय
शान्तं घोरं
मूढं वा प्रत्ययं
त्रिगुणमेवारम्भन्ते।
चलं च
गुणवृत्तमिति
क्षिप्रपरिणामि
चित्तमुक्तम्।
रूपातिशया
वृत्त्यतिशयाश्च
परस्परेण विरुद्ध्यन्ते
सामान्यानि
त्वतिशयैः सह
प्रवर्तन्ते।
एवमेते गुणा
इतरेतराश्रयेणोपार्जितसुखदुःखमोहप्रत्यया
इति सर्वे
सर्वरूपा
भवति,
गुणप्रधानभावकृतस्त्वेषां
विशेष इति।
तस्माद्दुःखमेव
सर्वं
विवेकिन
इति।
तदस्य
महतो
दुःखसमुदायस्य
प्रभवबीजमविद्या।
तस्याश्च
सम्यग्दर्शनमभावहेतुः।
यथा
चिकित्साशास्त्रं
चतुर्व्यूहं रोगो
रोगहेतुरारोग्यं
भैषज्यमिति।
एवमिदमपि
शास्त्रं
चतुर्व्यूहमेव।
तद्यथा संसारः
संसारहेतुर्मोक्षो
मोक्षोपाय
इति। तत्र
दुःखबहुलः
संसारो हेयः।
प्रधानपुरुषयोः
संयोगो
हेयहेतुः।
संयोगस्यात्यन्तिकी
निवृत्तिर्हानम्।
हानोपायः
सम्यग्दर्शनम्।
तत्र
हातुः
स्वरूपमुपादेयं
वा हेयं वा न
भवितुमर्हति।
हाने
तस्योच्छेदवादप्रसङ्गः, उपादाने
च हेतुवादः।
उभयप्रत्याख्याने
च शाश्वतवाद
इत्येतत्सम्यग्दर्शनम्॥१५॥
अव०- तदेतच्छास्त्रं
चतुर्व्यूहमित्यभिधीयते
हेयं
दुःखमनागतम्॥१६॥
व्या०
भा० दुःखमतीतमुपभोगेनाऽतिवाहितं
न हेयपक्षे
वर्तते।
वर्तमानं च
स्वक्षणे
भोगारूढमिति
न तत्क्षणान्तरे
हेयतामापद्यते।
तस्माद्यदेवानागतं
दुःखं
तदेवाक्षिपात्रकल्पं
योगिनं
क्लिश्नाति, नेतरं
प्रतिपत्तारम्।
तदेव
हेयतामापद्यते॥१६॥
अव०- तस्माद्यदेव
हेयमित्युच्यते, तस्यैव
कारणं
प्रतिनिर्दिश्यते
द्रष्टृदृश्ययोः
संयोगो
हेयहेतुः॥१७॥
व्या०
भा० द्रष्टा
बुद्धेः प्रतिसंवेदी
पुरुषः।
दृश्या
बुद्धिसत्त्वोपारूढाः
सर्वे धर्माः।
तदेतद्दृश्यमयस्कान्तमणिकल्पं
सन्निधिमात्रोपकारि
दृश्यत्वेन
स्वं भवति
पुरुषस्य
दृशिरूपस्य
स्वामिनः।
अनुभवकर्मविषतामापन्नमन्यस्वरूपेण
प्रतिलब्धात्मकम्।
स्वतन्त्रमपि
परार्थत्वात्परतन्त्रम्।
तयोर्दृग्दर्शनशक्त्योरनादिरर्थकृतः
संयोगो
हेयहेतुर्दुःखस्य
कारणमित्यर्थः।
तथा चोक्तम् तत्संयोगहेतुविवर्जनात्स्यादयमात्यन्तिको
दुःखप्रतीकारः।
कस्मात्? दुःखहेतोः
परिहार्यस्य
प्रतीकारदर्शनात्।
तद्यथा
पादतलस्य
भेद्यता, कण्टकस्य
भेत्तृत्वं, परिहारः कण्टकस्य
पादानधिष्ठानं
पादत्राणव्यवहितेन
वाऽधिष्ठानम्।
एतत्त्रयं यो
वेद लोके स
तत्र
प्रतीकारमारम्भमाणो
भेदजं दुःखं
नाप्नोति।
कस्मात्? त्रित्वोपलब्धिसामर्थ्यादिति।
अत्रापि
तापकस्य रजसः
सत्त्वमेव
तप्यम्। कथं
तपिक्रियायाः
कर्मस्थत्वात्। सत्त्वे
कर्मणि
तपिक्रिया
नापरिणामिनि
निष्क्रिये
क्षेत्रज्ञे।
दर्शितविषयत्वात्सत्त्वे
तु तप्यमाने
तदाकारानुरोधी
पुरुषोऽनुतप्यत
इति॥१७॥
अव०- दृश्यस्वरूपमुच्यते
प्रकाशक्रियास्थितिशीलं
भूतेन्द्रियाऽऽत्मकं भोगाऽपवर्गार्थं
दृश्यम्॥१८॥
व्या०
भा० प्रकाशशीलं
सत्त्वम्।
क्रियाशीलं
रजः।
स्थितिशीलं
तम इति। एते
गुणाः
परस्परोपरक्तप्रविभागाः
(परिणामिनः)
संयोगविभागधर्माण
इतरेतरोपाश्रयेणोपार्जितमूर्तयः
परस्पराङ्गाङ्गित्वेऽप्यसम्भिन्नशक्तिप्रविभागाः।
तुल्यजातीयातुल्यजातीयशक्तिभेदानुपातिनः।
प्रधानवेलायामुपदर्शितसन्निधाना
गुणत्वेऽपि च
व्यापारमात्रेण
प्रधानान्तर्णीतानुमितास्तिताः
पुरुषार्थकर्तव्यतया
प्रयुक्तसामर्थ्याः
सन्निधिमात्रोपकारिणोऽयस्कान्तमणिकल्पाः।
प्रत्ययमन्तरेणैकतमस्य
वृत्तिमनुवर्तमानाः
प्रधानशब्दवाच्या
भवन्ति।
एतद्दृश्यमित्युच्यते।
तदेतद्दृश्यं
भूतेन्द्रियात्मकं
भूतभावेन
पृथिव्यादिना
सूक्ष्मस्थूलेन
परिणमते।
तथेन्द्रियभावेन
श्रोत्रादिना
सूक्ष्मस्थूलेन
परिणमत इति।
तत्तु
नाप्रयोजनम्, अपि तु
प्रयोजनमुररीकृत्य
प्रवर्तत इति
भोगापवर्गार्थं
हि तद्दृश्यं
पुरुषस्येति।
तत्रेष्टानिष्टगुणस्वरूपावधारणमविभागापन्नं
भोगः।
भोक्तुः
स्वरूपावधारणमपवर्ग
इति द्वयोरतिरिक्तमन्यद्दर्शनं
नास्ति। तथा
चोक्तं अयं
तु खलु त्रिषु
गुणेषु
कर्तृष्वकर्तरि
च पुरुषे
तुल्यातुल्यजातीये
चतुर्थे
तत्क्रियासाक्षिण्युपनीयमानान्सर्वभावानुपपन्नाननुपश्यन् न
दर्शनमन्यच्छङ्कत
इति।
तावेतौ
भोगापवर्गौ
बुद्धिकृतौ
बुद्धावेव वर्तमानौ
कथं पुरुषे व्यपदिश्येते
इति। यथा च
जयः पराजयो वा
योद्धृषु
वर्तमानः
स्वामिनि
व्यपदिश्यते, स हि तस्य
फलस्य
भोक्तेति।
एवं
बन्धमोक्षौ
बुद्धावेव
वर्तमानौ
पुरुषे
व्यपदिश्येते
बुद्धेरेव
पुरुषार्थापरिसमाप्तिर्बन्धस्तदर्थावसायो
मोक्ष इति।
एतेन
ग्रहणधारणोहापोहतत्त्वज्ञानाभिनिवेशा
बुद्धौ
वर्तमानाः
पुरुषेऽध्यारोपितसद्भावाः।
स हि तत्फलस्य
भोक्तेति॥१८॥
अव०- दृश्यानां
तु गुणानां
स्वरूपभेदावधारणार्थमिदमारभ्यते
विशेषाविशेषलिङ्गमात्राऽलिङ्गानि
गुणपर्वाणि॥१९॥
व्या०
भा० तत्राऽऽकाशवाय्वग्न्युदकभूमयो
भूतानि शब्दस्पर्शरूपरसगन्धतन्मात्राणामविशेषाणां
विशेषाः। तथा
श्रोत्रत्वक्चक्षुर्जिह्वाघ्राणानि
बुद्धीन्द्रियाणि।
वाक्पाणिपादपायूपस्थानि
कर्मेन्द्रियाणि।
एकादशं मनः
सर्वार्थम्।
इत्येतान्यस्मितालक्षणस्याविशेषस्य
विशेषाः।
गुणानामेष
षोडशको
विशेषपरिणामः।
षडविशेषाः।
तद्यथा शब्दतन्मात्रं, स्पर्शतन्मात्रं, रूपतन्मात्रं, रसतन्मात्रं, गन्धतन्मात्रं
चेत्येकद्वित्रिचतुष्पञ्चलक्षणाः
शब्दादयः
पञ्चाविशेषाः, षष्ठश्चाविशेषोऽस्मितामात्र
इति। एते
सत्तामात्रस्यात्मनो
महतः
षदविशेषपरिणामाः।
यत्तत्परमविशेषेभ्यो
लिङ्गमात्रं
महत्तत्त्वं
तस्मिन्नेते सत्तामात्रे
महत्यात्मन्यवस्थाय
विवृद्धिकाष्ठामनुभवन्ति।
प्रतिसंसृज्यमानाश्च
तस्मिन्नेव
सत्तामात्रे
महत्यात्मन्यवस्थाय
यत्तन्निःसत्तासत्तं
निःसदसन्निरसदव्यक्तमलिङ्गं
प्रधानं
तत्प्रतियन्तीति।
एष तेषां
लिङ्गमात्रः
परिणामः।
निःसत्ताऽसत्तं
चालिङ्गपरिणाम
इति।
अलिङ्गावस्थायां
न पुरुषार्थो
हेतुः।
नालिङ्गावस्थायामादौ
पुरुषार्थता
कारणं भवतीति।
न तस्याः
पुरुषार्थता
कारणं भवति।
नासौ
पुरुषार्थकृतेति
नित्याख्यायते।
त्रयाणां
त्ववस्थाविशेषाणामादौ
पुरुषार्थता
कारणं भवति। स
चार्थो
हेतुर्निमित्तं
कारणं
भवतीत्यनित्याख्यायते।
गुणास्तु
सर्वधर्मानुपातिनो
न प्रत्यस्तमयन्ते
नोपजायन्ते।
व्यक्तिभिरेवातीतानागतव्ययागमवतीभिर्गुणान्वयिनीभिरुपजननापायधर्मका
इव प्रत्यवभासन्ते।
यथा देवदत्तो
दरिद्राति।
कस्मात्? यतोऽस्य
म्रियन्ते
गाव इति।
गवामेव
मरणात्तस्य
दरिद्रता न
स्वरूपहानादिति
समः समाधिः।
लिङ्गमात्रमलिङ्गस्य
प्रत्यासन्नं, तत्र
तत्संसृष्टं
विविच्यते
क्रमानतिवृत्तेः।
तथा षडविशेषा
लिङ्गमात्रे
संसृष्टा
विविच्यन्ते।
परिणामक्रमनियमात्। तथा
तेष्वविशेषेषु
भूतेन्द्रियाणि
संसृष्टानि
विविच्यन्ते।
तथा चोक्तं
पुरस्तात्। न
विशेषेभ्यः
परं
तत्त्वान्तरमस्तीति
विशेषाणां
नास्ति
तत्त्वान्तरपरिणामः।
तेषां तु
धर्मलक्षणावस्थापरिणामा
व्याख्यायिष्यन्ते॥१९॥
अव०- व्याख्यातं
दृश्यम्। अथ
द्रष्टुः
स्वरूपावधारणार्थमिदमारभ्यते
द्रष्टा
दृशिमात्रः
शुद्धोऽपि
प्रत्ययाऽनुपश्यः॥२०॥
व्या०
भा० दृशिमात्र
इति
दृक्शक्तिरेव
विशेषणापरामृष्टेत्यर्थः।
स पुरुषो
बुद्धेः
प्रतिसंवेदी।
स बुद्धेर्न
सरूपो
नात्यन्तं
विरूप इति। न
तावत्सरूपः।
कस्मात्? ज्ञाताज्ञातविषयत्वात्परिणामिनी
हि बुद्धिः।
तस्याश्च
विषयो
गवादिर्घटादिर्वा
ज्ञातश्चाज्ञातश्चेति
पर्णामित्वं
दर्शयति।
सदाज्ञातविषयत्वं
तु
पुरुषस्यापरिणामित्वं
परिदीपयति।
कस्मात्? न
हि बुद्धिश्च
नाम
पुरुषविषयश्च
स्याद्गृहीता
चागृहीता
चेति सिद्धं
पुरुषस्य
सदाज्ञातविषयत्वं
ततश्चापरिणामित्वमिति।
किं च, परार्था
बुद्धिः
संहत्यकारित्वात्,
स्वार्थः
पुरुष इति।
तथा
सर्वार्थाध्यवसायकत्वात्त्रिगुणा
बुद्धिस्त्रिगुणत्वादचेतनेति।
गुणानां
तूपद्रष्टा
पुरुष इति।
अतो न सरूपः।
अस्तु
तर्हि विरूप
इति।
नात्यन्तं
विरूपः।
कस्मात्? शुद्धोऽप्यसौ
प्रत्ययानुपश्यः।
यतः प्रत्ययं
बौद्धमनुपश्यति।
तमनुपश्यन्नतदात्माऽपि
तदात्मक इव
प्रत्यवभासते।
तथा चोक्तम् अपरिणामिनी
हि
भोक्तृशक्तिरप्रतिसङ्क्रमा
च
परिणामिन्यर्थे
प्रतिसङ्क्रान्तेव
तद्वृत्तमनुपतति।
तस्याश्च
प्राप्तचैतन्योपग्रहरूपाया
बुद्धिवृत्तेरनुकारमात्रतया
बुद्धिवृत्त्यविशिष्टा
हि
ज्ञानवृत्तिरित्याख्यायते॥२०॥
तदर्थ
एव दृश्यस्याऽऽत्मा॥२१॥
व्या०
भा० दृशिरूपस्य
पुरुषस्य
कर्मरूपतामापन्नं
दृश्यमिति
तदर्थ एव
दृश्यस्यात्मा
भवति॥२१॥
अव० तत्स्वरूपं
तु पररूपेण प्रतिलब्धात्मकं
भोगापवर्गार्थतायां
कृतायां
पुरुषेण न
दृश्यत इति।
स्वरूपहानादस्य
नाशः
प्राप्तः। न
तु विनश्यति।
कस्मात्?
कृतार्थम्प्रति
नष्टमप्यनष्टं
तदन्यसाधारणत्वात्॥२२॥
व्या०
भा० कृतार्थमेकं
पुरुषं प्रति
दृश्यं
नष्टमपि नाशं प्राप्तमप्यनष्टं
तदन्यपुरुषसाधारणत्वात्।
कुशलं पुरुषं
प्रति नाशं
प्राप्तमप्यकुशलान्पुरुषान्प्रति
न
कृतार्थमिति
तेषां दृशेः
कर्मविषयतामापन्नं, लभत एव
पररूपेणात्मरूपमिति।
अतश्च
दृग्दृशशक्त्योर्नित्यत्वादनादिः
संयोगो
व्याख्यात
इति। तथा
चोक्तं धर्मिणामनादिसंयोगाद्धर्ममात्राणामप्यनादिः
संयोगः इति॥२२॥
अव०- संयोगस्वरूपाभिधित्सयेदं
सूत्रं
प्रववृते
स्वस्वामिशक्त्योः
स्वरूपोपलब्धिहेतुः
संयोगः॥२३॥
व्या०
भा० पुरुषः
स्वामी दृश्येन
स्वेन
दर्शनार्थं
संयुक्तः।
तस्मात् (संयोगाद्)
दृश्यस्योपलब्धिर्या
स भोगः। या तु
द्रष्टुः
स्वरूपोपलब्धिः
सोऽपवर्गः।
दर्शनकार्यावसानः
संयोग इति
दर्शनं वियोगस्य
कारणमुक्तम्।
दर्शनमदर्शनस्य
प्रतिद्वन्द्वीत्यदर्शनं
संयोगनिमित्तमुक्तम्।
नात्र दर्शनं
मोक्षकारणम्।
अदर्शनाभावादेव
बन्धाभावः, स मोक्ष
इति।
दर्शनस्य
भावे बन्धकारणस्यादर्शनस्य
नाश इत्यतो
दर्शनज्ञानं
कैवल्यकारणमुक्तम्।
किं
चेदमदर्शनं
नाम? किं
गुणानामधिकारः? आहो
स्विद्दृशिरूपस्य
स्वामिनो
दर्शितविषयस्य
प्रधानचित्तस्यानुत्पादः? स्वस्मिन्दृश्ये
विद्यमाने यो
दर्शनाभावः, किमर्थवत्ता
गुणानाम्? अथाऽविद्या
स्वचित्तेन
सह निरुद्धा
स्वचित्तस्योत्पत्तिबीजम्? किं
स्थितिसंस्कारक्षये
गतिसंस्काराभिव्यक्तिः? यत्रेदमुक्तं
प्रधानं
स्थित्यैव
वर्तमानं विकाराकरणादप्रधानं
स्यात्। तथा
गत्यैव
वर्तमानं
विकारनित्यत्वादप्रधानं
स्यात्।
उभयथा चास्य
प्रवृत्तिः
प्रधानव्यवहारं
लभते नान्यथा।
कारणान्तरेष्वपि
कल्पितेष्वेव
समानश्चर्चः।
दर्शनशक्तिरेवादर्शनमित्येके।
प्रधानस्यात्मख्यापनार्था
प्रवृत्तिरिति
श्रुतेः।
सर्वबोध्यबोधसमर्थः
प्राक्प्रवृत्तेः
पुरुषो न
पश्यति।
सर्वकार्यकरणसमर्थं
दृश्यं तदा न
दृश्यत इति।
उभयस्याप्यदर्शनं
धर्म इत्येके।
तत्रेदं दृश्यस्य
स्वात्मभूतमपि (पुरुषप्रत्ययापेक्षं
दर्शनं दृश्यधर्मत्वेन
भवति, तथा
पुरुषस्यानात्मभूतमपि)
दृश्यप्रत्ययापेक्षं
पुरुषधर्मत्वेनेवादर्शनमवभासते।
दर्शनज्ञानमेवादर्शनमिति
केचिदभिदधति।
इत्येते
शास्त्रगता
विकल्पाः।
तत्र
विकल्पबहुत्वमेतत्सर्वपुरुषाणां
गुणानां
संयोगे
साधारणविषयम्॥२३॥
अव०- यस्तु
प्रत्यक्चेतनस्य
स्वबुद्धिसंयोगः
तस्य
हेतुरविद्या॥२४॥
व्या०
भा० विपर्ययज्ञानवासनेत्यर्थः।
विपर्ययज्ञानवासनावासिता
च न
कार्यनिष्ठां
पुरुषख्यातिं
बुद्धिः
प्राप्नोति।
साधिकारा
पुनरावर्तते।
सा तु
पुरुषख्यातिपर्यवसानां
कार्यनिष्ठां
प्राप्नोति।
चरिताधिकारा
निवृत्तादर्शना
बन्धकरणाभावान्न
पुनरावर्तते।
अत्र
कश्चित्षण्डकोपाख्यानेनोद्घाटयति
मुग्धया
भार्ययाभिधीयते
षण्डकः आर्यपुत्र!
अपत्यवती मे
भगिनी
किमर्थं
नाहमिति? स
तामाह मृतस्तेऽहमपत्यमुत्पादयिष्यामीति।
तथेदं
विद्यमानं
ज्ञानं
चित्तनिवृत्तिं
न करोति,
विनष्टं
करिष्यतीति
का प्रत्याशा?
तत्राचार्यदेशीयो
वक्ति ननु
बुद्धिनिवृत्तिरेव
मोक्षः।
अदर्शनकारणाभावाद्बुद्धिनिवृत्तिः।
तच्चादर्शनं
बन्धकारणं
दर्शनान्निवर्तते।
तत्र
चित्तनिवृत्तिरेव
मोक्षः।
किमर्थमस्थान
एवास्य
मतिविभ्रमः?॥२४॥
अव०- हेयं
दुःखम्।
हेयकारणं च
संयोगाख्यं
सनिमित्तमुक्तम्।
अतः परं हानं
वक्तव्यम्
तदभावात्संयोगाऽभावो
हानं
तद्दृशेः
कैवल्यम्॥२५॥
व्या०
भा० तस्यादर्शनस्याभावाद्बुद्धिपुरुषसंयोगाभाव
आत्यन्तिको
बन्धनोपरम
इत्यर्थः।
एतद्धानम्।
तद्दृशेः
कैवल्यं
पुरुषस्यामिश्रीभावः
पुनरसंयोगो
गुणैरित्यर्थः।
दुःखकारणनिवृत्तौ
दुःखोपरमो
हानम्। तदा
स्वरूपप्रतिष्ठः
पुरुष
इत्युक्तम्॥२५॥
अव०- अथ
हानस्य कः
प्राप्त्युपायः? इति
विवेकख्यातिरविप्लवा
हानोपायः॥२६॥
व्या०
भा० सत्त्वपुरुषाऽन्यताप्रत्ययो
विवेकख्यातिः।
सा
त्वनिवृत्तमिथ्याज्ञाना
प्लवते। यदा
मिथ्याज्ञानं
दग्धबीजभावं
बन्ध्यप्रसवं
सम्पद्यते, तदा
विधूतक्लेशरजसः
सत्त्वस्य
परे वैशारद्ये
परस्यां वशीकारसंज्ञायां
वर्तमानस्य
विवेकप्रत्ययप्रवाहो
निर्मलो भवति।
सा
विवेकख्यातिरविप्लवा
हानस्योपायः।
ततो
मिथ्याज्ञानस्य
दग्धबीजभावोपगमः।
पुनश्चाप्रसव
इत्येष
मोक्षस्य
मार्गो हासन्योपाय
इति॥२६॥
तस्य
सप्तधा
प्रान्तभूमिः
प्रज्ञा॥२७॥
तस्येति
प्रत्युदितख्यातेः
प्रत्याम्नायः।
सप्तधेत्यशुद्ध्यावरणमलापगमाच्चित्तस्य
प्रत्ययान्तरानुत्पादे
सति
सप्तप्रकारैव
प्रज्ञा
विवेकिनो
भवति। तद्यथा
(1)
परिज्ञानं
हेयं नास्य
पुनः
परिज्ञेयमस्ति।
(2)
क्षीणाः
हेयहेतवो न
पुनरेतेषां
क्षेतव्यमस्ति।
(3) साक्षात्कृतं
निरोधसमाधिना
हानम्।
(4)
भावितो
विवेकख्यातिरूपो
हानोपाय इति।
एषा
चतुष्टयी
कार्यविमुक्तिः
प्रज्ञायाः।
चित्तविमुक्तिस्तु
त्रयी
(5)
चरिताधिकारा
बुद्धिः।
(6)
गुणा
गिरिशिखरकूटच्युता
इव ग्रावाणो
निरवस्थानाः
स्वकारणे
प्रलयाभिमुखाः
सह तेनास्तं
गच्छन्ति। न
चैषां
प्रविलीनानां
पुनरस्त्युत्पादः
प्रयोजनाभावादिति।
(7)
एतस्यामवस्थायां
गुणसम्बन्धातीतः
स्वरूपमात्रज्योतिरमलः
केवली पुरुष
इति।
एतां
सप्तविधां
प्रान्तभूमिप्रज्ञामनुपश्यन्पुरुषः
कुशल
इत्याख्यायते।
प्रतिप्रसवेऽपि
चित्तस्य
मुक्तः कुशल
इत्येव भवति
गुणातीतत्वादिति॥२७॥
अव०- सिद्धा
भवति
विवेकख्यातिर्हानोपाय
इति। न च
सिद्धिरन्तरेण
साधनमित्येतदारभ्यते
योगाङ्गाऽनुष्ठानादशुद्धिक्षये
ज्ञानदीप्तिराविवेकख्यातेः॥२८॥
व्या०
भा० योगाङ्गान्यष्टावभिधायिष्यमाणानि।
तेषामुष्ठानात्पञ्चपर्वणो
विपर्यस्याशुद्धिरूपस्य
क्षयो नाशः।
तत्क्षये
सम्यग्ज्ञानस्याभिव्यक्तिः।
यथा यथा च
साधनान्यनुष्ठीयन्ते, तथा तथा (तनुत्वमशुद्धिरापद्यते।
यथा यथा च
अशुद्धिः
क्षीयते तथा
तथा) क्षयक्रमानुरोधिनी
ज्ञानस्यापि
दीप्तिर्विवर्धते।
सा खल्वेषा
विवृद्धिः
प्रकर्षमनुभवत्याविवेकख्यातेः। आगुणपुरुषस्वरूपविज्ञानादित्यर्थः।
योगाङ्गानुष्ठानमशुद्धेर्वियोगकारणम्।
यथा
परशुश्छेद्यस्य।
विवेकख्यातेस्तु
प्राप्तिकारणं
यथा धर्मः
सुखस्य, नान्यथा
कारणम्।
कति
चैतानि
कारणानि
शास्त्रे
भवन्ति? नवैवेत्याह।
तद्यथा
उत्पत्तिस्थित्यभिव्यक्तिविकारप्रत्ययात्ययः।
वियोगान्यत्वधृतयः
कारणं नवधा
स्मृतम्॥ इति।
(1)
तत्रोत्पत्तिकारणं
मनो भवति
विज्ञानस्य।
(2)
स्थितिकारणं
मनसः
पुरुषार्थता
शरीरस्येवाहार
इति।
(3)
अभिव्यक्तिकारणं
यथा
रूपस्यालोकस्तथा
रूपज्ञानम्।
(4)
विकारकारणं
मनसो
विषयान्तरम्, यथाग्निः
पाक्यस्य।
(5)
प्रत्ययकारणं
धूमज्ञानमग्निज्ञानस्य।
(6)
प्राप्तिकारणं
योगाङ्गानुष्ठानं
विवेकख्यातेः।
(7)
वियोगकारणं
तदेवाशुद्धेः।
(8)
अन्यत्वकारणं यथा
सुवर्णस्य सुवर्णकारः।
एवमेकस्य
स्त्रीप्रत्ययस्याविद्या
मूढत्वे, द्वेषो
दुःखत्वे, रागः
सुखत्वे, तत्त्वज्ञानं
माध्यस्थ्ये।
(9)
धृतिकारणं
शरीरमिन्द्रियाणाम्।
तानि च तस्य।
महाभूतानि
शरीराणाम्।
तानि च
परस्परं
सर्वेषाम्।
तैर्यग्यौनमानुषदैवतानि
च
परस्परार्थत्वादिति।
एवं
नवकारणानि।
तानि च
यथासम्भवं
पदार्थान्तरेष्वपि
योज्यानि।
योगाङ्गानुष्ठानं
तु द्विधैव
कारणत्वं लभत
इति॥२८॥
अव०- अथ
योगाङ्गान्यवधार्यन्ते
यमनियमाऽऽसनप्राणायामप्रत्याहारधारणाध्यानसमाधयोऽष्टावङ्गानि॥२९॥
व्या०
भा० यथाक्रममेतेषामनुष्ठानं
स्वरूपं च
वक्ष्यामः॥२९॥
अव०- तत्र
अहिंसाऽसत्याऽस्तेयब्रह्मचर्याऽपरिग्रहा
यमाः॥३०॥
व्या०
भा० तत्राहिंसा
सर्वथा
सर्वदा
सर्वभूतानामनभिद्रोहः।
उत्तरे च
यमनियमास्तन्मूलास्तत्सिद्धिपरतयैव
तत्प्रतिपादनाय
प्रतिपाद्यन्ते, तदवदातरूपकरणायैवोपादीयन्ते।
तथा चोक्तं न
खल्वयं
ब्राह्मणो
यथा यथा
व्रतानि
बहूनि समादित्सते, तथा तथा
प्रमादकृतेभ्यो
हिंसानिदानेभ्यो
निवर्तमानस्तामेवावदातरूपामहिंसां
करोति।
सत्यं
यथार्थे
वाङ्मनसे।
यथा दृष्टं
यथानुमितं
यथा श्रुतं, तथा
वाङ्मनश्च।
परत्र
स्वबोधसङ्क्रान्तये
वागुक्ता, सा यदि न
वञ्चिता
भ्रान्ता वा
प्रतिपत्तिबन्ध्या
वा भवेदिति।
एषा
सर्वभूतोपकारार्थं
प्रवृत्ता न
भूतोपघाताय।
यदि
चैवमप्यभिधीयमाना
भूतोपघातपरैव
स्यान्न
सत्यं भवेत्, पापमेव
भवेत। तेन
पुण्याभासेन
पुण्यप्रतिरूपकेण
कष्टतमं
प्राप्नुयात्, तस्मात्परीक्ष्य
सर्वभूतहितं
सत्यं ब्रूयात्।
स्तेयमशास्त्रपूर्वकं
द्रव्याणां
परतः स्वीकरणम्।
तत्प्रतिषेधः
पुनरस्प्रुहारूपमस्तेयमिति।
ब्रह्मचर्यं
गुप्तेन्द्रियस्योपस्थस्य
संयमः।
विषयाणामर्जनरक्षणक्षयसङ्गहिंसादोषदर्शनादस्वीकरणमपरिग्रह
इत्येते यमाः॥३०॥
अव०- ते तु
जातिदेशकालसमयाऽनवच्छिन्नाः
सार्वभौमा
महाव्रतम्॥३१॥
व्या०
भा० तत्राहिंसा
जात्यवच्छिन्ना
मत्स्यबन्धकस्य
मत्स्येष्वेव
नान्यत्र हिंसा।
सैव
देशावच्छिन्ना
न तीर्थे
हनिष्यामीति।
सैव
कालावच्छिन्ना
न
चतुर्दश्यां, न
पुण्येऽहनि
हनिष्यामीति।
सैव
त्रिभिरुपरतस्य
समयावच्छिन्ना
देवब्राह्मणार्थे
नान्यथा
हनिष्यामीति।
यथा च
क्षत्रियाणां
युद्ध एव
हिंसा
नान्यत्रेति।
एभिर्जातिदेशकालसमयैरनवच्छिन्ना
अहिंसादयः
सर्वथैव
परिपालनीयाः।
सर्वभूमिषु
सर्वविषयेषु
सर्वथैवाविदितव्यभिचाराः
सार्वभौमा
महाव्रतमित्युच्यते॥३१॥
शौचसंतोषतपःस्वाध्यायेश्वरप्रणिधानानि
नियमाः॥३२॥
व्या०
भा० तत्र
शौचं
मृज्जलादिजनितं
मेध्याभ्यवहरणादि
च बाह्यम्। आभ्यन्तरं
चित्तमलानामाक्षालनम्।
सन्तोषः
सन्निहितसाधनादधिकस्यानुपादित्सा।
तपो
द्वन्द्वसहनम्।
द्वन्द्वश्च
जिघत्सापिपासे, शीतोष्णे, स्थानासने, काष्ठमौनाकारमौने
च। व्रतानि
चैषां
यथायोगं
कृच्छ्रचान्द्रायणसान्तपनादीनि।
स्वाध्यायो
मोक्षशास्त्राणामध्ययनं
प्रणवजपो वा।
ईश्वरप्रणिधानं
तस्मिन्परमगुरौ
सर्वकर्मार्पणम्।
शम्यासनस्थोऽथ
पथि व्रजन्वा स्वस्थः
परिक्षीणवितर्कजालः।
संसारबीजक्षयमीक्षमाणः स्यान्नित्यमुक्तोऽमृतभोगभागी॥
यत्रेदमुक्तं
ततः
प्रत्यक्चेतनाधिगमोऽप्यन्तरायाभावश्च
[यो.सू. १.२९] इति॥३२॥
अव०- एतेषां
यमनियमानां
वितर्कबाधने
प्रतिपक्षभावनम्॥३३॥
व्या०
भा० यदास्य
ब्राह्मणस्य
हिंसादयो
वितर्का जायेरन्हनिष्याम्यहमपकारिणमनृतमपि
वक्ष्यामि, द्रव्यमप्यस्य
स्वीकरिष्यामि, दारेषु
चास्य व्यवायी
भविष्यामि, परिग्रहेषु
चास्य स्वामी
भविष्यामीति।
एवमुन्मार्गप्रवणवितर्कज्वरेणातिदीप्तेन
बाध्यमानस्तत्प्रतिपक्षान् भावयेत्।
घोरेषु
संसाराङ्गारेषु
पच्यमानेन
मया शरणमुपागतः
सर्वभूताभयप्रदानेन
योगधर्मः। स
खल्वहं
त्यक्त्वा
वितर्कान्पुनस्तानाददानस्तुल्यः
श्ववृत्तेनेति
भावयेत्। यथा
श्वा
वान्तावलेही
तथा
त्यक्तस्य
पुनराददान इत्येवमादि
सूत्रान्तरेष्वपि
योज्यम्॥३३॥
वितर्का
हिंसादयः
कृतकारिताऽनुमोदिता
लोभक्रोधमोहपूर्वका
मृदुमध्याऽधिमात्रा
दुःखाऽज्ञानाऽनन्तफला
इति प्रतिपक्षभावनम्॥३४॥
व्या०
भा० तत्र
हिंसा तावत् कृतकारितानुमोदितेति
त्रिधा।
एकैका
पुनस्त्रिधा लोभेन
मांसचर्मार्थेन, कोर्धेनापकृतमनेनेति, मोहेन
धर्मो मे
भविष्यतीति।
लोभक्रोधमोहाः
पुनस्त्रिविधा
मृदुमध्याधिमात्रा
इति। एवं
सप्तत्रिंशतिर्भेदा
भवन्ति
हिंसायाः।
मृदुमध्याधिमात्राः
पुनस्त्रिविधाः
मृदुमृदुर्मध्यमृदुस्तीव्रमृदुरिति।
तथा
मृदुमध्यो
मध्यमध्यस्तीव्रमध्य
इति। तथा
मृदुतीव्रो
मध्यतीव्रोऽधिमात्रतीव्र
इति। एवमेकाशीतिभेदा
हिंसा भवति।
सा
पुनर्नियमविकल्पसमुच्चयभेदादसङ्ख्येया
प्राणभृद्भेदस्यापरिसङ्ख्येयत्वादिति।
एवमनृतादिष्वपि
योज्यम्।
ते
खल्वमी
वितर्काः दुःखाज्ञानानन्तफला
इति
प्रतिपक्षभावनम्।
दुःखमज्ञानं
चानन्तं फलं
येषामिति
प्रतिपक्षभावनम्।
तथा च
हिंसकस्तावत्प्रथमं
बध्यस्य
वीर्यमाक्षिपति, ततश्च
शस्त्रादिनिपातेन
दुःखयति। ततो
जीवितादपि
मोचयति। ततो
वीर्याक्षेपादस्य
चेतनाचेतनमुपकरणं
क्षीणवीर्यं
भवति।
दुःखोत्पादान्नरकतिर्यक्प्रेतादिषु
दुःखमनुभवति।
जीवन्तव्यपरोपणात्प्रतिक्षणं
च
जीवितात्यये
वर्तमानो
मरणमिच्छन्नपि
दुःखविपाकस्य
नियतविपाकवेदनीयत्वात्कथञ्चिदेवोच्छ्वसिति।
यदि च कथञ्चित्पुण्यावापगता
हिंसा भवेत्, तत्र
सुखप्राप्तौ
भवेदल्पायुरिति।
एवमनृतादिष्वपि
योज्यं
यथासम्भवम्।
एवं
वितर्काणां
चामुमेवानुगतं
विपाकमनिष्टं
भावयन्न
वितर्केषु
मनः
प्रणिदधीत॥३४॥
अव०- प्रतिपक्षभावनाहेतोर्हेया
वितर्का यदाऽस्य
स्युरप्रसवधर्माणः, तदा
तत्कृतमैश्वर्यं
योगिनः सिद्धिसूचकं
भवति। तद्यथा
अहिंसाप्रतिष्ठायां
तत्सन्निधौ
वैरत्यागः॥३५॥
व्या०
भा० सर्वप्राणिनां
भवति॥३५॥
सत्यप्रतिष्ठायां
क्रियाफलाश्रयत्वम्॥३६॥
व्या०
भा० धार्मिको
भूया इति भवति
धार्मिकः।
स्वर्गं
प्राप्नुहीति
स्वर्गं
प्राप्नोति।
अमोघास्य
वाग्भवति॥३६॥
अस्तेयप्रतिष्ठायां
सर्वरत्नोपस्थानम्॥३७॥
व्या०
भा० सर्वदिक्स्थान्यस्योपतिष्ठन्ते
रत्नानि॥३७॥
ब्रह्मचर्यप्रतिष्ठायां
वीर्यलाभः॥३८॥
व्या०
भा० यस्य लाभादप्रतिघान्गुणानुत्कर्षयति।
सिद्धश्च
विनेयेषु
ज्ञानमाधातुं
समर्थो भवतीति॥३८॥
अपरिग्रहस्थैर्ये
जन्मकथन्तासम्बोधः॥३९॥
व्या०
भा० अस्य
भवति।
कोऽहमासम्? कथमहमासम्? किं
स्विदिदम्? कथं
स्विदिदम्? के वा
भविष्यामः? कथं वा
भविष्यामः? इत्येवमस्य
पूर्वान्तपरान्तमध्येष्वात्मभावजिज्ञासा
स्वरूपेणोपावर्तते।
एता यमस्थैर्ये
सिद्धयः॥३९॥
अव०- नियमेषु
वक्ष्यामः
शौचात्स्वाङ्गजुगुप्सा
परैरसंसर्गः॥४०॥
व्या०
भा० स्वाङ्गे
जुगुप्सायां
शौचमारम्भमाणः
कायावद्यदर्शी
कायानभिष्वङ्गी
यतिर्भवति।
किं च, परिरसंसर्गः
कायस्वभावावलोकी
स्वमपि कायं
जिहासुर्मृज्जलादिभिराक्षालयन्नपि
कायशुद्धिमपश्यन्कथं
परकायैरत्यन्तमेवाप्रयतैः
संसृज्येत॥४०॥
अव०- किं च,
सत्त्वशुद्धिसौमनस्यैकाग्र्येन्द्रियजयाऽत्मदर्शनयोग्यत्वानि
च॥४१॥
व्या०
भा० भवन्तीति
वाक्यशेषः।
शुचेः
सत्त्वशुद्धिः, ततः
सौमनस्यं, तत
ऐकाग्र्यम्, तत
इन्द्रियजयः, ततश्चात्मदर्शनयोग्यत्वं, बुद्धिसत्त्वस्य
भवतीत्येतच्छौचस्थैर्यादधिगम्यत
इति॥४१॥
सन्तोषादनुत्तमसुखलाभः॥४२॥
व्या०
भा० तथा
चोक्तं
यच्च
कामसुखं लोके
यच्च दिव्यं
महत्सुखम्।
तृष्णाक्षयसुखस्यैते
नार्हतः
षोडशीं कलाम्॥
इति॥४२॥
कायेन्द्रियसिद्धिरशुद्धिक्षयात्तपसः॥४३॥
व्या०
भा० निर्वर्त्यमानमेव
तपो
हिनस्त्यशुद्ध्यावरणफलम्।
तदावरणमलापगमात्कायसिद्धिरणिमाद्या। तथेन्द्रियसिद्धिर्दूराच्छ्रवणदर्शनाद्येति॥४३॥
स्वाध्यायादिष्टदेवतासम्प्रयोगः॥४४॥
व्या०
भा० देवा
ऋषयः
सिद्धाश्च
स्वाध्यायशीलस्य
दर्शनं
गच्छन्ति, कार्ये
चास्य
वर्तन्त इति॥४४॥
समाधिसिद्धिरीश्वरप्रणिधानात्॥४५॥
व्या०
भा० ईश्वरार्पितसर्वभावस्य
समाधिसिद्धिर्यया
सर्वमीप्सितभवितथं
जानाति
देशान्तरे देहान्तरे
कालान्तरे च।
ततोऽस्य
प्रज्ञा
यथाभूतं
प्रजानातीति॥४५॥
स्थिरसुखमासनम्॥४६॥
व्या०
भा० तद्यथा
पद्मासनम्, वीरासनं, भद्रासनं, स्वस्तिकं, दण्डासनं, सोपाश्रयं, पर्यङ्कं, क्रौञ्चनिषदनं, हस्तिनिषदनमुष्ट्रनिषदनं, समसंस्थानं, स्थिरसुखं
यथासुखं
चेत्येवमादीनि॥४६॥
प्रयत्नशैथिल्यानन्तसमापत्तिभ्याम्॥४७॥
व्या०
भा० भवतीति
वाक्यशेषः।
प्रयत्नोपरमात्सिध्यत्यासनं
येन नाङ्गमेजयो
भवति। अनन्ते
वा समापन्नं
चित्तमासनं
निर्वर्तयतीति॥४७॥
ततो
द्वन्द्वानभिघातः॥४८॥
व्या०
भा० शीतोष्णादिभिर्द्वन्द्वैरासनजयान्नाभिभूयते॥४८॥
तस्मिन्सति
श्वासप्रश्वासयोर्गतिविच्छेदः
प्राणायामः॥४९॥
व्या०
भा० सत्यासनजये
बाह्यस्य
वायोराचमनं
श्वासः।
कोष्ठ्यस्य
वायोर्निःसारणं
प्रश्वासः।
तयोर्गतिविच्छेद
उभयाभावः
प्राणायामः॥४९॥
अव०- स तु
बाह्याभ्यन्तरस्तम्भवृत्तिर्देशकालसंख्याभिः परिदृष्टो
दीर्घसूक्ष्मः॥५०॥
व्या०
भा० यत्र
प्रश्वासपूर्वको
गत्यभावः स
बाह्यः। यत्र
श्वासपूर्वको
गत्यभावः स
आभ्यन्तरः।
तृतीयः
स्तम्भवृत्तिर्यत्रोभयाभावः
सकृत्प्रयन्ताद्भवति।
यथा तप्ते
न्यस्तमुपले
जलं सर्वतः
सङ्कोचमापद्यते, तथा
द्वयोर्युगपद्गत्यभाव
इति।
त्रयोऽप्येते
देशेन
परिदृष्टाः इयानस्य
विषयो देश इति।
कालेन
परिदृष्टाः
क्षणानामियत्तावधारणेनावच्छिन्ना
इत्यर्थः।
सङ्ख्याभिः
परिदृष्टाः एतावद्भिः
श्वासप्रश्वासैः
प्रथम उद्घातस्तद्वन्निगृहीतस्यैतावद्भिर्द्वितीय
उद्घात एवं
तृतीयः। एवं
मृदुरेवं
मध्य एवं
तीव्र इति
सङ्ख्यापरिदृष्टः।
स
खल्वयमेवमभ्यस्तो
दीर्घसूक्ष्मः॥५०॥
बाह्याभ्यन्तरविषयाक्षेपी
चतुर्थः॥५१॥
व्या०
भा० देशकालसङ्ख्याभिर्बाह्यविषयः
परिदृष्ट आक्षिप्तः, तथाभ्यन्तरविषयः परिदृष्ट
आक्षिप्तः, उभयथा
दीर्घसूक्ष्मः।
तत्पूर्वको
भूमिजयात्क्रमेणोभयोर्गत्यभावश्चतुर्थः
प्राणायामः।
तृतीयस्तु
विषयानालोचितो
गत्यभावः
सकृदारब्ध एव
देशकालसङ्ख्याभिः
परिदृष्टो
दीर्घसूक्ष्मः।
चतुर्थस्तु
श्वासप्रश्वासयोर्विषयावधारणात्क्रमेण
भूमिजयादुभयाक्षेपपूर्वको
गत्यभावश्चतुर्थः
प्राणायाम
इत्ययं
विशेषः॥५१॥
ततः
क्षीयते
प्रकाशावरणम्॥५२॥
व्या०
भा० प्राणायामानभ्यस्यतोऽस्य
योगिनः
क्षीयते
विवेकज्ञानावरणीयं
कर्म। यत्तदाचक्षते
महामोहमयेनेन्द्रजालेन
प्रकाशशीलं
सत्त्वमावृत्य
तदेवाकार्ये
नियुङ्क्त इति।
तदस्य
प्रकाशावरणं
कर्म
संसारनिबन्धनं
प्राणायामाभ्यासाद्दुर्बलं
भवति
प्रतिक्षणं च
क्षीयते। तथा
चोक्तम् तपो
न परं
प्राणायामात्ततो
विशुद्धिर्मलानां
दीप्तिश्च
ज्ञानस्य इति॥५२॥
अव०- किं च,
धारणासु
च योग्यता
मनसः॥५३॥
व्या०
भा० प्राणायामाभ्यासादेव
प्रच्छर्दनविधारणाभ्यां
वा प्राणस्य
[यो.सू. १.३५] इति
वचनात्॥५३॥
स्वविषयासम्प्रयोगे
चित्तस्य स्वरूपानुकार
इवेन्द्रियाणां
प्रत्याहारः॥५४॥
स्वविषयसम्प्रयोगाभावे
चित्तस्वरूपानुकार
इवेति चित्तनिरोधे
चित्तवन्निरुद्धानीन्द्रियाणि
नेतरेद्रियजयवदुपायान्तरमपेक्षन्ते।
यथा मधुकरराजं
मक्षिका
उत्पतन्तमनूत्पतन्ति, निविशमानमनुनिविशन्ते
तथेन्द्रियाणि
चित्तनिरोधे
निरुद्धानीत्येष
प्रत्याहारः॥५४॥
ततः
परमा
वश्यतेन्द्रियाणाम्॥५५॥
शब्दादिष्वव्यसनमिन्द्रियजय
इति केचित। सक्तिर्व्यसनं
व्यस्यत्येनं
श्रेयस इति
अविरुद्धा
प्रतिपत्तिर्न्याय्या।
शब्दादिसम्प्रयोगः
स्वेच्छयेत्यन्ये।
रागद्वेषाभावे
सुखदुःखशून्यं
शब्दादिज्ञानमिन्द्रियजय
इति केचित्।
चित्तैकाग्र्यादप्रतिपत्तिरेवेति
जैगीषव्यः।
ततश्च परमा त्वियं
वश्यता
यच्चित्तनिरोधे
निरुद्धानीन्द्रियाणि
नेतरेन्द्रियजयवत्प्रयत्नकृतमुपायान्तरमपेक्षन्ते
योगिन इति॥५५॥
इति
पतञ्जलिविरचिते
योगसूत्रे
द्वितीयः साधनपादः।